කාල යක්ෂ - 8 - සතුරු මිතුරු

හත් වන කොටසට

"අනිත් එක ... වැඩිය කල් නොදා අර චක්‍රාවාට සංගමේ වැඩේ බලනවා. මොකද ඒක අපි නොහිතන තරම් වැදගත්. මිනිස්සුන්ව මිත්‍යාවෙන් ඈත් කරන්න නම් ඒ මිනිස්සුන්ට ඊට වඩා රස ටොපියක් දෙන්න වෙනවා කන්න. මේ දවස් වල නැගලම යන්නේ සක්වල සංචාර." 

වෙරිමතින් සිනාසෙමින් ඩෙලෝ පැවසිය. 

"ඩෙලෝ ඒක මම බලා ගන්නම්... මට අර උදව්ව කරලා දෙනවා. "

"හරි හරි ...ඕක මහ දෙයක් ද ...මම ක්‍රොෆින්ගර්ව බලා ගන්නම්... මාව ඔන්න ඔය ඉස්සරහින් දාගෙන යනවා.. "

අද එතැන් සිට ...

පැරදිසෝ  ලොව  සිය සුර්යයා වට භ්‍රමණය වුවද , එහි වැසියෝ එය එතරම්  වැදගත් දෙයක් ලෙස සැලකුයේ නැත. ඔවුන්ට වැදගත් වුයේ ඔවුන්ගේ  චක්‍රවාටයේ හරි මැද වූ  කළු කුහරයත්, එය වසා පැතිරුණු  චොන්ඩ්‍රයිට් වළාව තුල එහි පිහිටීමත් පමණි.  චොන්ඩ්‍රයිට් යනු විශ්වය බිහිවූ මොහොතේ නිපදවුණු, කිසිදු සුර්යයෙකු, ග්‍රහයෙකු හෝ ඇස්ට්‍රොයිඩයක් බිහිවීමට මුලික නොවුණු දුවිලි විශේෂයකි. පදාර්ථයේ මුලික තැනුම් ඒකක වූ බොහෝ මුලද්‍රව්‍ය මේ වලාව තුල නොයිදුල්ව තිබිණි. පැරදිසෝ  ලොවෙහි පසෙහි වූ විකිරණ ශීලි   මුලද්‍රව්‍ය බහුලතාවය මෙම  චොන්ඩ්‍රයිට් වලාවේ ප්‍රතිඵලයකි. Sombrero චක්‍රාවාටය විශ්වයේ වූ අනෙකුත් චක්‍රාවාට වලට වඩා වෙනස් වීම නිසා සක්වල සංචාරකයින් ගේ සහ විශේෂයෙන්  ව්‍යාපාර පිණිස පැමිණි විවිධ සක්වල ජීවීන්ගේ විශේෂ අවධානයට පත්ව තිබිණි. පැරදිසෝ ලොව චක්‍රාවාට සංගමය හා සම්බන්ධ වී තවම එතරම් කලක් ගතවී නොතිබිණි. එහි වූ බලවත් රාජ්‍යයයන් කිහිපයක් පමණක් මෙම සක්වල සංචාර සහ ව්‍යාපාර කටයුතු ආරම්භ  කර තිබුණු අතර  ඒ වන විට විශ්වයේ පැවති අන්තර් චක්‍රාවාට ගනුදෙනු සහ ගමනාගමන කටයුතුවලට සාපේක්ෂව  පැරදිසෝ ලොව  යනු මහා නගරයක පිහිටි කුඩා තේ කඩයකට සමාන විය. 

 ************

ඇලෙන්ඩිට දෙවෙනි වරටත් සිහිය ලැබෙමින් තිබිණි.   නාසයට දැනුනු සිසිල් වාතයේ වූ දුර්ගන්ධයත්, වැතිර සිටි රළු පෘෂ්ටයෙහි වූ සිසිලත්  සෙමින් අවදි වන ඇගේ සිරුරට  දැනිණි.   සිදුවුයේ කුමක් ද, සිටින්නේ කොහෙද තබා තමා මේ දකින්නේ සිහිනයක් ද සැබෑවක් ද යන්න නිෂ්චය කරගැනීමට ද ඇයට අපහසු විය.   සිහිසුන්ව මෙතෙක් වෙලා ඇය සිටි ඉතා සාමකාමී ස්භාවය යටපත් කරමින් සිය  සිරුරෙහි සංවේදනාද , මනස ටිකෙන් ටික ව්‍යාකුල වීම නිසා දැනෙන අපහසුවද ඇයව පිඩාවට පත් කළේය. සෙමින් දෑස් විවර කල ඇයට අඳුරු කුටියක වූ මලානික විදුලි ලාම්පුවක සේයාවක් පෙනුණි.  තමා වැතිර සිටින රළු  පාෂාණමය පෘෂ්ටය බිත්ති කොනක වූ අතර, විරුද්ද පස බිත්තියෙහි වූ කහ පැහැති  මලානික විදුලි බුබුලත්, කෙලින්ම ඉදිරියෙන් වූ  යකඩ කූරු සවිවූ දොර සහ අසල සිටි මුර සෙබලාගේ චායාව ඇයට පෙනිණි.  නැවත දෑස් පියා තමා සිටින තැන සහ සිදුවූ දෙය පිළිබඳව යමක් වටහා ගැනීමට ඇය උත්සාහ කළාය.

ලේසර් ප්‍රහාරයෙන් දැවී ගිය බ්‍රයිටෝගේ වේදනාකාරී මුහුණේ ඌ භීතිය ඇයට මැවී පෙනිණි. බ්‍රයිටෝ... සේප්පුව .... එහි දුටු අමුතු දසුන්, මිතුරියන් සමග දිය කෙලිය, මව සහ ඇගේ හුරතල් බලු පැටියාගේ රුව සලරුවක් මෙන් මැවී පෙනුණි. ඒ සියල්ල අතීතයද, තමා දැන් සිටින්නේ ඒ සියල්ලෙන් බොහෝ වෙනස් වූ සහ මින් පෙර අත් නොවිදි, අමුතුම අත්දැකීමක් තුල බවද ඇයට වැටහී ගියේය. 

මේ කොරන්වේලි හෝ ටෙරමි නොවන බව කාමරයෙහි වූ දුර්ගන්ධයෙන් ද, එහි වූ අඳුරු  බියකරු බවෙන් ද ඇය තේරුම් ගත්තේය. මෙවැනි පරණ තාලයේ හිර මැදිරි ගැන ඇය පොත පතින් කියවා තිබුනද, නගරයේ කිසි තැනක එවැනි සිර මැදිරි හෝ රැඳවුම් ස්ථාන නොමැති බව ඇය දැන සිටියාය.

පරණ තාලයේ ගොඩ නැගිලි 

යලිත් සෙමින් දෑස් විවර කර තමන්ට පිටුපා සිටින මුර සෙබළා දෙස බැලු ඇය, අඳුරට හුරුවී තිබුණු දෑස් වලින් දොරෙන් අපිට ඇත්තේ කුමක් දැයි වටහා ගැනීමට තැත් කළාය. දොරට එපිටින් වූ පඩි පෙළක  අවසන් පියගැට පෙළ කිහිපයක් සහ පඩිපෙළට යාබදව වම් පසට වන්නට ඈතට විහිදුනු කොරිදොවකුත් එහි වූ මාලානික විදුලි ආලෝකය සහ ගබඩා කාමර යැයි සැක කල හැකි දොරටු කිහිපයකුත් ඇයට පෙනිණි. සෙබලා ඇඳ සිටි කළු පැහැති ඇඳුම සහ අතෙහි වූ ලේසර් තුවක්කුවක්, ඉනෙහි පැලදී දිගු කඩුවත් නිසා ඔවුන් රජුගේ සෙබළු නොවන බව ද  පැහැදිලි විය. කඩු කිනිසි යනු මිලේච්ඡ, යල් පැනගිය ආයුධ ලෙස නෙමින්දෙර් රජු විසින් ප්‍රතික්ෂේප කර දමා තිබුණේය. මෙම වර්ගයේ ආයුධ පාවිච්චි කරන භටයින් ඇති හමුදාවක් ගැන ඇලෙන්ඩි  නොදැන සිටියද  තමා මේ සිටින්නේ බොහෝ විට කඳුකරයේ කොතැනක හෝ වූ භූගත කාමරයක බවත්,  රජුට විරුද්ධව සටන් වදින තවත් හමුදාවක් තමා පැහැරගෙන ඇති බවත් ඇය තේරුම් ගනිමින් සිටියාය.  නැවත දෑස් පියාගෙන සිදුවන්නට හැකි දේ පිළිබඳව අනුමාන කිරීමට උත්සාහ කළා පමණි.

භූගත සිර මැදිරි 

"කෝ තාම සිහිය ඇවිල්ල නැද්ද ? මේ වෙද්දී සිහිය එන්න ඕනේ. කෝ ඔය දොර අරන්න"

තවත් මොහොතක් සිහිසුන්ව ලෙස සිටින ලෙස රඟපෑමට තීරණය කළ ඇලෙන්ඩි සිය හුස්ම වැටීම සියුම් කර ගත්තාය.

"වතුර ටිකක් ගෙනල්ල ඉහින්න. සමහර විට කලිනුත් සිහි නැති වෙච්ච නිසා,  සිහිය එන්න පරක්කු ඇති. මුරට සිටි සෙබළා නැවත දොර ඇරගෙන වතුර ගෙනෙන්නට යන හැටිත්, තමා අසලට ආ තැනැත්තිය, විරුද්ධ පස වූ බිත්තිය දෙසට ගොස් ඉලෙක්ට්‍රොනික යතුරු පුවරුවක යමක් සටහන් කරන හැටිත්  ඇලෙන්ඩිට ඇසිණි.

සෙමින් දෑස් අර බැලු ඇය හැර තිබෙන දොරත්, තමාට පිටුපා විදුලි බුබුල යට සිට කුමක්දෝ සටහන් කරන වෛද්‍ය වරියක් බඳු වූ කාන්තාව දෙසත් බලා  වහා ක්‍රියාත්මක විය.

ඇසුරු සැනින් හුන් තැනින් නැගිට ගත් ඇය, හැකි වෙර දමා පිටුපා සිටි කාන්තාව දෙසට පැන හැකි තරම් වෙර යොදා ඇගේ හිස ගෙන ඉදිරි පස වූ බිත්තියේ ගැසුවාය.  බලාපොරොත්තු නොවූ හදිසි වේගවත්  පහරින් සිහි සුන්ව ඇදවැටුණු කාන්තාවගේ අතින් විසිවුණු ඉලෙක්ට්‍රොනික පුවරුව වහා අතට ගත් ඇය  වේගයෙන් දොර දෙසට දිව ගොස්  වට පිට බැලුවාය. පඩි පෙළත් සමග වම් පසින් ඉදිරියට වූ කොරිඩෝරය දෙසට ඇවිද යන මුර සෙබලාගේ චායාව සහ ඔහු සමග කතාවට ආ තවත් පුද්ගලයෙකුගේ නොපැහැදිලි  හඩක් ඇයට ඇසිණි.   සිතීමට මොහොතක් වත් කල් නොගත් ඇය අගුළු නොදා තිබූ දොරෙන් එලියට පැන පඩිපෙළ දිගේ උඩට දිව ගියාය.  උඩ  මහලේ කුමක් තිබේද, කවුරුන් සිටීදැයි නොදැන එකවරම දිවයාම අනුවණ කමක් උවද  කිරීමට වෙනත් දෙයක් නොමැති වුයෙන් ඇය වේගය මදක් බාල කරමින් උඩු මහලට පිවිසුනාය.  මලානිකව ආලෝකමත් වූ එහි වුයේද යම් කිසි ගබඩා කාමර සහ ඇතුලට විහිදුනු කොරිඩෝවකි.  පියගැට පෙළ අවසන් වන තැනම  වම් පසට වූ කාමරය තුල  සිටි සෙබලා ඇයට පිටුපා සිටි හෙයින් ඇය උඩට නගිනු දුටුවේ නැත.  මොහොතකට නතර වුනු ඇලෙන්ඩි, උඩු මහලට දිව යෑම නතර කර කොරිඩෝව දෙසට හැරුණේ, බලාපොරොත්තු නොවන ලෙස කිසිවෙකු හමුවීම වළක්වා මද වෙලාවක් සැඟවී කල්පනා කිරීමට තැනක් සොයමිනි.  තව මොහොතකින් තමා නැති බව දැනගෙන සියල්ලෝම කලබල වී සොයන විට අනාරක්ෂිත තැනක සිටීමට වඩා, කිසිවකු බලාපොරොත්තු නොවන තැනක සැඟවීම සුදුසු බව ඇය සිතුවාය.

පියගැටපෙළ අසල වූ  කාමරයේ දොර හැර දමා සෙබලා කාමරය තුල වූ යම් දෙයක් ගැන සටහන් තබමින් සිටියේය. දොරත් සමගම වම් පසට වූ  තරමක් විශාල කවුළුවෙන් එහි වූ කබඩ් සහ ගොඩ ගසා තිබුණු පෙට්ටි රැසක් ඇය දුටුවේය. කවුළුව අසලම වූ  කබඩ් සහ පෙට්ටිගොඩ අතර වූ හිඩැස තුලට සෙබලාට නොදැනෙන ලෙස පැන ගැනීමට ඇය ක්ෂණිකව තීරණය කළේය.  

සෙබලා ආපසු හැරීමට පෙර කාමරය තුලට බැළලියක මෙන් සෙමින් ඇතුළු වූ ඇය හෙමින් සීරුවේ වම් පසට හැරී දොර අසල වූ පෙට්ටි ගොඩත් ,  ඊට මදක් එහාට වන්නට වූ කබඩ් එකත් අතර වූ අඩි 2ක පමණ පරතරය තුලට වැද හිඳ ගත්තාය. කවුළුව ඇගේ හිසට ඉහලින් වූ අතර කාමරය තුල තවත් පෙට්ටි සහ විවිද මළු පුරවා තිබිණි.

ගත වුයේ නිමේෂයකි . එකවරම මහා හඩින් සයිරනයක් නාද වන්නට විය.     

සටහන් කරමින් සිටි දෙය නවතා වහා ආපසු හැරුණු සෙබලා දොර වසා එලියට යනු  ඇලෙන්ඩි යන්තමින් දුටුවාය.

එය,  ඇය නැති බව හඟවන සයිරනය විය.

"වැඩි දුරක් යන්න විදියක් නැහැ.. පහත මාලයේ සිටි සෙබලා සහ තවත් කිහිප දෙනෙක් උඩට එමින් පැවසීය.

"ජෙරෝ, ඔය කාමරේ බලන්න... " එලියට යමින් සිටි සෙබලාට කවුදෝ කියනු ඇයට ඇසිණි. 

"මම ඒ කාමරේ මෙච්චර වෙලා හිටියේ. එකේ කවුරුත් නැහැ..."

"හරි මම උඩට යන්නම්. මේ කාමර ටික ඔක්කොම හෝදිසි කරන්න."

"ඔය ඩොක්ටර් ව පරිස්සමින් උඩට අරන් එන්න. "

හඬවල් කිහිපයක් සහ පියගැට නැගෙන හඩ රාශියක් ඇලෙන්ඩි ට ඇසුණේය.

හඬවල්  නෑසෙන තෙක් තවත් මොහොතක් සිටි අයුරින්ම සිටි ඇය, අතෙහි වූ ටෙක්සෝ  පිටුව දෙස බැලුවාය. දින දෙතුන් සියයක් පැරණි එම මොඩලයේ ටෙක්සෝ පිටු බාවිතා කරන වෛද්‍ය වරුන් සිය රටෙහි සිටින බව දැනීම ඇයට පුදුමයක් විය. අතින් ඉවතට විසිවීම නිසා ඕෆ්  වී තිබුණු  පිටුව නැවත පනගන්වා එයට පිවිසීමට බැලුවද, හිමි කරුගේ චිත්ත තරංග නොමැතිව පිවිසීමට නොහැකි වූ බැවින් එය ඇඳ  සිටි ඇඳුම තුලට දමා ගත්තේ ඇගේ ලැබ්  එකට ගොස් විවෘත කර බැලීම පිණිසය. චිත්ත තරංග  රෙසනෝටයක් නොමැතිව පිටුව තුලට පිවිසිය නොහැකි බව දත් ඇය, ඇයට  තිබුණි ස්වල්ප කාලය තමා සිටින්නේ කොහිදැයි  වටහා ගැනීමට  යෙදවීමට සිතුවාය.      

කාමරයේ වූ පෙට්ටිවල සටහන් වී තිබුණු රතු පාට වෘක හිස රෙඩ් වුල්ෆ් කඳවුරේ නිල සලකුණ බව ඇය දැන සිටියාය.  එක්කෝ ඇය මේ සිටින්නේ රෙඩ් වුල්ෆ් කඳවුරේය. එසේ නැත්නම්   රෙඩ් වුල්ෆ්  වෙත භාණ්ඩ සපයන අතරමැදි ස්ථානයකය.

ඇයට ගැටළුව වුයේ රජුගේ හමුදාවට අයිති කඳවුරක සිටින සෙබළුන්ගේ නිල ඇඳුම වෙනස් වුයේ කෙසේද යන්නයි. 

පෙට්ටියක් හැර බැලීමට උත්සාහ කලද, ආයුදයක් නොමැතිව එය කල නොහැකි බව ඇයට පෙනිණි.

තමා දෙසට ලංවන අඩි ශබ්ධයක් ඇසුනෙන් ඇය වහා දොර මුල්ල වෙතට වී බිත්තියට හේත්තු විය.

වාසනාවට අඩි හඬ දොර පසු කර ඈතට ගියේය.

අසල වූ කබඩ් එක වෙත ගොස එය හැරීමට තැත් කලද, අගුළු දමා තිබු හෙයින් එයද ව්‍යර්ථ වී ගියේය.

සෙබලා පෙර සිටි තැන වෙත ඇය  ගියේ  ඔහු අවසානයේ යමක් සටහන් කරමින් සිටියේ කුමක් පිළිබඳවදැයි  දැන ගැනීමටය.

ඇගේ සැකය නිවැරදි විය. කලබලයෙන් ගිය සෙබලාට පෙට්ටිය සීල් කිරීමට අතපසු වී ඇත. ලෝහමය පෙට්ටිය තුල වුයේ යම්කිසි යන්ත්‍රයක අමතර කොටස් වැනි කොටස් කිහිපයකි. එවැනි පෙට්ටි රැසක් කාමරය තුල විය.   

කාමරය තුලින් කිසිදු හෝඩුවාවක් සොයා ගැනීමට නොහැකි වූ තැන තමාව පැහැරගෙන විත් මෙවැනි තැනක රඳවා ගැනීමට අවශ්‍ය කාටදැයි සිතා බැලීමට ඇය මොහොතක් ගත කළාය.

බ්‍රයිටෝගේ අවසන් වදන්, ඔහු පෙන්වමින් සිටි දේ සහ  ඇය කරමින් සිටි ලේසර් ස්පේට්ල්  කොහෙරන්ස් පරීක්ෂණය සහ බ්‍රයිටෝ සහ ඔහුගේ මිතුරන් විසින් කරමින් සිටි  පරීක්ෂණත්, ඇය  සහය දුන් TEMA ව්‍යාපෘතියත් ගැන ඇය මෙනෙහි කර බැලුවාය.  තමාව මුලින්ම පැහැර ගැනීමට දින කිහිපයකට පෙර කර්වියෝ සහ විටාසෝ  TEMA ගැනත් ,  ලේසර් ප්ලස් ඇම්ප්ලිෆිකේෂන් (pulse amplification) තමාගෙන් විමසූ හැටිත් ඇයට සිහිවිය.  

TEMA  ව්‍යාපෘතිය පෙරදිග රාජ්‍යයේ නව නිපැයුම් සහ පරීක්ෂණ පිලිබඳ අධ්‍යයනායතයේ සිදු කෙරුණු ප්‍රධානම ව්‍යාපෘතියකි.  නෙමින්දෙර් රජුගේ අනු දැනුම ඇතිව සිදු කෙරුණු එහි අරමුණ වුයේ ක්වන්ටම් තලයේදී ශක්තියේ හැසිරීම නිරීක්ෂණය කිරීමත්, ශක්තිය ඇතිවීම සහ නැතිවීම සිදුවන ආකාරය අධ්‍යනය කිරීමත් ය. එහිදී ඇයගේ කාර්යය වුයේ ලේසර් තරංග වල අන්වායාම සහබන්ධනය වැඩි කිරීමෙන්, ක්වන්ටම් තලයේදී  වැඩි බලයක් ලබා ගැනීමට උත්සාහ කිරීමයි.  TEMA  හි අවසාන අරමුණ වුයේ ශක්තිය අලුතින් නිර්මාණය කර ගැනීමයි. නමුත්  ඒ සඳහා අවශ්‍ය තරම් ලේසර් කිරණ  වල බලය වැඩි කර ගැනීමට ඔවුනට තවමත් නොහැකි වී තිබිණි. සැබවින්ම ඔවුනට එවැනි මහා බලයක් යොදා ක්වන්ටම් තලය තුල සෙල්ලම් දැමීමට අවශ්‍ය කරන  ප්‍රධානම මුලද්‍රවයක්  වන ක්ලවරියොන් වල දැඩි හිඟ තාවයක් පැවතිණි.  නෙමින්දෙර් රජු ගේ හයිලැන්ඩර්  වෙළඳ ගිවිසුමේ ප්‍රධාන අරමුණක් වුයේ යහමින්  කාටත් රහසින් ක්ලවරියොන් සපයා ගැනීමයි. 

මේ සියල්ල යලිත් සලකා බැලූ ඇයට වැටහුනේ, කවුරුන් හෝ තමාව රැගෙන විත් ඇත්තේ මේ පිළිබඳව දන ගැනීමට හෝ, රජුගේ මෙම කටයුතු ගැන විස්තර දැන ගැනීමට බවය. නමුත්  ඇයට ගැටලුව වුයේ අසරණ බ්‍රයිටෝව මරා දමා තමාව පැහැර ගැනීමට තරම් තිබෙන උවමනාව කුමක් ද යන්නයි.

කාමරය තුලින් කිසිවක් දැන ගැනීමට නොහැකි වූ තැන ඇය, හෙමින් සැරේ කවුළුවෙන් එපිට බැලුවේ පඩි පෙලින් උඩට නොගොස් ඒ වෙනුවට මෙතනින් පිටවීමට කොරිඩෝවේ ඇතුලේ  වෙනත් දොරටු ඇත්දැයි දන ගැනීමේ අටියෙනි.    

නමුත් තමා  සොයා ආ සෙබළුන් පහල ගැන අවධානය අඩු කොට ඉහල මහල වෙත ගියේ සමහරවිට බිම් මට්ටම නිසා විය හැකි බව ඇයට කල්පනා විය. නමුත් එකවරම පඩි  නැග ඉහලට යාම වෙනුවට ඇය  මලානික එළිය සහිත අඳුරු කොරිඩෝව දෙසට යාමට සෙමින් දොර විවර කලාය.

සෙබළුන් දෙදෙනෙකු කතා කරන හඩක් ඇතුළු කාමරයකින් ඇසුනද, කොරිඩෝව පාළුවට  ගොස් තිබිණි. වහා තීරණයක් ගත් ඇය සෙමින් දොර වසා හැකි ඉක්මනින්  කොරිඩෝවේ කෙලවර දෙසට ගියාය.

එකම විදියට තැනු ගබඩා කාමර කිහිපයක් සහ, වම් පසට වූ  දෙවෙනි කාමරය තුල පෙර පරිදිම බාන්ඩ පිළිබඳව තොරතුරු සටහන් කර ගන්නා සෙබළුන් දෙදෙනෙකු සෙමින් සීරුවේ පසු කල ඇයට, ඊට මදක් ඔබ්බෙන් දකුණු පසට  වූ තවත් පඩි පෙළක් ඇස ගැටිණි.  දෙවරක් නොසිතා සෙමින් පඩි පෙළ බාගයක් නැග  උඩු මහලට පිවිසීමට පෙර මදක් නැවතුනු ඇයට උඩු මහලේ කතා කරන හඬ සහ වඩා හොඳ ආලෝකයක් ඇති බව පෙනිණි.  කල හැකි වෙනත් කිසිවක් නොවුයෙන් උඩට යාමට තීරණය කලේ සිදුවන ඕනෙම දෙයකට මුහුණදීමට සිතාගෙනය. පඩි පෙලේ අවසානයට පැමිණි ඇය  හෙමින් සීරුවේ  ආලෝකය ආ වම් පසට යාමට තීරණය කළා පමණි.

"ඔහොමම නතර වෙනවා. " තියුණු කඩු තුඩක සියුම් වේදනාව ඇගේ පිට පෙදසට දැනු නාය.

පසුපසින් පැමිණි සෙබලා ඉවසීමෙන් යුතුව පැවසීය. 

"මම කොහෙද මේ ඉන්නේ ? හිටි තැනම නතර වුනු ඇලෙන්ඩි ඇසුවාය.

"ඒක  දැන  ගන්න  පුළුවන්.  යමු ඔහොම ඉස්සරහට... " ගොරෝසු සෙබල හඬ පැවසිය.

තවත් කාමර කිහිපයක්  සහ ශාලාවක් පසු කරමින්  ඇලෙන්ඩි  ඉදිරියට ඇදුණාය.  සෙබලාගේ කඩු  තුඩ තවමත් ඇගේ ශරීරය ස්පර්ශ වෙමින් තිබුණු හෙයින් ඇය ක්ෂණික තීරණ කිසිවකට යොමු නොවී සිදුවන දෙයට මුහුණ දීමට සිතා ගත්තාය.

අමුතු හැඩයේ ගොඩ නැගිල්ල 

ඉදිරියෙන් වූ විශාල දොරින් එලියට පැමිණි ඇයට  තවත් පරණ තාලයේ ගොඩනැගිලි කිහිපයක් සහ ඉදිරිපසින් වූ අමුතු හැඩයකින් යුත් තවත්  නවීන ගොඩනැගිල්ලක්  දිස් විය. ඉදිරිපස අංගනයේ පරණ තාලයේ මයින්ඩ් ජෙට් යානා කිහිපය සහ ගොඩබිම බර උපකරණ ගෙන යාමට යොදා ගන්නා විශාල ක්ලානා රථ කිහිපයක් ද  විය.  පසුපසින් පැමිණි සෙබලාගේ නියමයෙන් අමුතු හැඩයේ ගොඩ නගිල්ලට ඇතුළු වූ ඇය  ඉදිරියේ වුයේ  කිසිදිනෙක බලාපොරොත්තු නොවූ දසුනකි.